రామ్ములక్కాయతో మూడు రకాలు

మీలో ఎందరికి గుర్తూ? చిన్నప్పుడు రాంమ్ములక్కాయని పందారలో నంచుకుని తింటం! రామ్ములక్కాయ మరీ అంత పండూకాకుండ మరీ పచ్చీ కాకుండగా దోరగా పండింది సిన్న సిన్న ముక్కలుగ కోసేసి పందారజల్లుకు లాగిస్తే ఉంమ్మ.
అట్టానే పందార బదులు ఉప్పు కారం జల్లుకుని లాగించినా ఓకే!!
ఈడసూడండా!! రామ్ములక్కాయతోని మూడ్రకాలంట.
1. నిటారు రకం
దోర రామ్ములక్కాయని అడ్డంగా ముక్కలు జేస్కోండా (కింద జూపెట్టిన బొమ్మలో ఆడు మూడ్రకాల రామ్ములక్కాయల్ని నించోబెట్టాడు అయి - red, yellow, heirloom. heirloom అంటే నాటు రకం అని అనుకున్టా!). ఒకదానిమీన ఇంకోటన్ట ఎట్టండా. అర్గ్యూలా ఆకులంటా!! మనేందెలుసుద్దీ?? కొత్తిమీర నాలుగాకులు, పుదీనా నాలుగాకులు సమ్మగా కడిగేసి సన్నగా తరిగేసి పైన జల్లండా. ఓ రెండు కిట్న తులసాకులంట కుమ్మండా. ఓ రెండు సెంచాలు ఆలివ్ ఆయిలంట కుమ్మరించండా. కొంచెం కారం లేక మాడ్చి నలగొట్టిన మిరాయలు, కొంచెం ఉప్పు జల్లండా
లాగించండా. ఇది జెప్పాల్సిన పనిల్యా!
2. రోస్టు
ఓ నాలుగు ద్రాచ్చా రామ్ములక్కాయలు అట్టాగే ఆలివ్ నూనెలోనంటా, ఓ చిటాకు ఉప్పుజల్లి ఏపించండా. ఓ బేకింగు పేనా లోకి మార్చేసి, ఓవెన్ లో 425 F ఏడిమీన 7 - 10 నిమిషాలు రామ్ములక్కాయ తొక్క పగిలిపొయేంతవరకూ రోశ్టు జేయాలంట. అయినక ఓవెన్ని ఆపేసి బయటకి లాగి కిట్న తులసి లేకపోతే రెండు పుదీనా ఆకులేసి కుమ్మటమేనంట.
3. సరసా ఛీఛీ సల్సా అంట
ఓ ఐదు ఇదేదో రామ్ములక్కాయ సిన్న సిన్న ముక్కలుగా తరిగేసి, ఓ ఎర్ర ఉల్ల్స్ తరుక్కుని, పావుకప్పు సొంపు ఛీఛీ, నీ ఎంకమ్మ, సోంపు, ఓ అరడజను మిరగాయల్ని తరుక్కుని, ఓ బల్ల సెంచా (టేబిలు స్పూను) ఆలివ్ నూనె, ఓ బల్లసెంచా కమలా రసం ఓ పెద్ద బొచ్చలో ఏసి కలిపేసి ఉప్పు, మాడగొట్టి నలగ్గొట్టిన మిరియాలు ఏసి లాగించమంటాడు.


ఈ పుటోబు యాణ్ణుంచో నూక్కొచ్చి ఏడబెడుతన్నా. కాపీరైటు కాపీలెప్టు గోలమనకెందుకూ!!


[Photo is pointing to womansday.com. If any objection for linking to this photo, please let me know. I will remove it.]

కాలిబసీత

ఈ మధ్య మాకు ఉచితంగా ఓ పత్రిక (పుత్రిక కాదులేవయ్యా బాబు) వస్తోంది. దానిపేరు దేనికిలేగానీ, కొన్ని కొన్ని మంచి మంచి అవసరమైన విషయాలు ఉన్నాయ్ అందులో. మనకి కావాల్సిన సెక్షన్లో నన్ను ఆకర్షించిన వంటకం ఇది. దీని పేరు కాలిబసీత (Calibasita)

కావాల్సినవి -
4 జుకిని[1]. ఇదేందిది అనుకోవద్దు. ఇది మన బీరకాయకి పెద్దమ్మ బామ్మర్ది అన్నగారికి చెల్లెలు వరస. ఇది దొరక్కపోతే కీరా వాడుకోవచ్చు, ఏంపర్లేదు.
2 టేబిలు స్పూల ఆలివ్ ఆయిల్.
1 ఒకమోస్తరు సైజు ఉల్స్
1 వెల్లుల్లి రెబ్బ
3 మొక్కజొన్న కండెలు.
2 రోమా[2] రాంములక్కాయలు బాగా పండినవి.
1/2 కప్పు మొత్సరిల్ల ఛీజు లేక ఫెటా ఛీజు. అది ఇది దొరక్కపోతే పన్నీరు ముక్కలు అనుకోండి.[ఇది మాత్రం మీ ఇష్టం కావాలంటే వేస్కోవచ్చు లేకపోతే లేదు]
రుచికి కోషర్[3] ఉప్పు.
ఇదేందిది కోషర్ ఉప్పు అంటారా?
ఇది మన ఇంట్లో వాడుకునే ఉప్పే కాకపోతే కొంచెం గండ్ల ఉప్పులా ఉంతుంది. మరియూ కోషర్ ఉప్పులో ఐయోడిన్ ఉండదు.
పద్ధతి -
ముందుగా జుకిని ని ఓ మాదిరిసైజు ముక్కలుగా కోసి ఓ చిల్లుల గిన్నెలో వేసి, కొంచెం ఉప్పుజల్లి పక్కనబెట్టు.
ఉల్స్ ని తరుక్కో సన్నగా.
వెల్లుల్ల్ని ఓ సారి కుక్కి తొక్క తీసేసి సన్నగా తరుక్కో.
రాంములక్కాయ తరుక్కో సన్నగా
మొక్కజొన్న కండె నుండి మొక్కజొన్న ఇత్తనాలని తీ. ఎట్టా? ఒలుస్తూ కూకుంటావా? తెల్లారుద్ది. కత్తిపెట్టి ఈడజూపిచ్చినట్టుగా చెయ్యి

ఒక భాండీ తీస్కుని ఆలివ్ ఆఉఇల్ వేసి, పోసి కాదు, ఓ రెండు చెంచాలు వేసి, వేడెక్కంగనే ఉల్స్, వెల్లుల్లి వెసి మూణ్ణిమిషాలు ఏపు.
పైన తరుక్కున్న జుచ్చిని, మొక్కజొన్నని ఎయ్యి, 6-7 నిమిషాలు ఏపు.
తరుక్కున్న రాంములక్కాయలు వేసి 2-3 నిమిషాలు ఏగనీ.
[గ్రేటెడ్ ఛీజ్ జల్లు]
దింపేసి రొట్టెతోనో గుడ్డుతోచేసిన అట్టుతోనో లాగించు.

నోట్ -
1. జుకిని http://en.wikipedia.org/wiki/Zucchini
2. రోమా రాంములక్కాయలు http://en.wikipedia.org/wiki/Roma_tomato
3. కోషర్ ఉప్పు http://en.wikipedia.org/wiki/Kosher_salt

Nutrition Facts
* Calories 143
* Total Fat 7g
* Saturated Fat 1g
* Cholesterol NA
* Sodium 602mg
* Total Carbohydrates 21g
* Dietary Fiber 4g
* Protein 4g

(రాం)ములక్కాయలు

నిన్న (రాం)ములక్కాయలు వండుకున్నాం. అదేంది బ్రాకెట్టులో రాం అని రాసారు? ప్రతీదానికీ రామ నామం జపిస్తారా అని ఎవురైనా అనుకోవచ్చు. తప్పులేదు.
ఏందయ్యా కత అంటే రాంములక్కాయ మరియూ ములక్కాయ కూర. ఏంటి?? నోరూరిందా? మరి ఊరదా? ముక్కులు వాసన కోసం ఎగురుతున్నాయా? మరి ములక్కాయ రాంములక్కాయలో ఉడుకుతుంటే ఆ వాసనే వేరుకదా!!
దీనిక్కావాల్సింది -
ఎర్రని నవనవలాడుతున్న రాంములక్కాయలు ఓ రెండు, నాజూకైన ములక్కాయలు ఓ రెండు, ఓ ఉల్స్, నాలుగు వెల్లుల్లి, కొంచెం అల్లం, ఓ చెటాకు కొత్తిమీర, ఓ చెంచాల నూనె, తిరగమాత గింజలు గట్రా!!. నేను ఈ మధ్య వంటలకి ఆలివ్ ఆయిల్ నూనె వాడుతున్నా
ఇక మొదలుపెడదామా!!
ముందు, మిర్చిని సన్నగా తరుక్కో. తర్వాత, అరచేతినిబెట్టి, వెల్లుల్లి రెబ్బల్ని కుక్కు (క్రష్), అప్పుడు వాటిపైన తొక్కతీసేసి సన్నగా ఛాప్ చేసి పక్కన్బెట్. అల్లం, పైన తొక్క తోసేసి, సన్నగా తర్క్స్, పక్కన్బెట్స్.

ఉల్లిపాయని సన్నగా తరుక్కో, ములక్కాయల్ని సుబ్బరంగా కడుక్కుని ఐదు ముక్కలుగా నరుకు, ఆ రెండు రామ్ములక్కాయల్ని ఛాప్ చేస్కో.

పొయ్యి వెలిగించు, చట్టి పెట్టు అదే, డేగిషా.
నూనె పొయ్యి. కాగంగనే మినుములు, పచ్చిశనగపప్పు, ఎండు మిర్చి, ఆవాలు, జిలకర, చివరాకరికి కర్వేపాకులు లతో తిరగమాత వేసేయ్. ఓ చెటికెడు పసుపు వెయ్యి. ఇప్పుడు మిర్చి, వెల్లుల్లి వెయ్యి. ఓ సారి బాగా కలుపు. ఇప్పుడు ఉల్స్ వెయ్యి, డీప్ గోల్డెన్ బ్రౌన్ వచ్చేదాకా వేయించు.
అయ్యిందా, ఇప్పుడు తరుక్కున్న ములక్కాయలు, రాంములక్కాయలు వేసేయి. కలుపు లేక గంటే బెట్టి తిప్పు. ఉప్పు, కారం వెయ్యి కలియ తిప్పు, మూతెట్టు. గ్రేవీ అంటే నీళ్లు సరిపోను లేవు అనుకుంటే ఓ గళాసు పోస్కో (ఆంటే అవసరాన్ని బట్టి అని)
ఉడకనీ ఇక.
ఉడికినాక, కొత్తిమీర (పైన్లీ వాష్డ్ అండ్ ఛాప్ప్డ్ - శుభ్రంగా కడిగిన మరియూ సన్నగా తరిగిన) జల్లు - ఇంకొంచేస్పు ఇగరనీ - పొయ్యి ఆపేసి డెగిషాని దింపి ఇక సిగ్గు లేకండా అదేన్వాయా సిగ్గు పడకుండా లాగించు.



కొందరు ములక్కాయని జస్ట్ గుజ్జుని పళ్ళతో లాగించేసి పక్కన పడెస్తారు. కానీ ములక్కాయ రుచి ఆసాంతం నమిలి పీల్చి పిప్పిని మాత్రం వదిలనప్పుడే. అందుకే సిగ్గు లేకండా అదేన్వాయా సిగ్గు పడకుండా లాగించు అన్నది. కాబట్టి, మునక్కాయ ముక్క బాగా ఉడకటం ఇక్కడ కీ. అలానే ఈ కూర ఆరోగ్యానికి కూడా మంచిదే!!

ఓటు

ఏందీ!! నేను బ్లాగు ఎమ్మెల్యేగా పోటీసేత్తనా నాకోటేయండీ అని అడుగుత్తున్నా అనుకుంటన్నారా? మరక్కడే ఉప్మాలో చెంచా ఏసారు.
ఈయాల రోవంత ఆకలిగా ఉండింది. మరీమద్దెన డైటింగు గట్రా సేత్తనాం, ఎస్సర్సైజులు సేత్తాన్నాంగదా. అందుకు. మామూలుగైతే ఓ సంచి సిప్పీసు అ.క.అ చిప్సు కరకరా నములుకుంటా మిగేటోళ్ళం కదా. మరి ఇప్పుడేంసెయ్యాల్రా బగమంతుడా అని ఆలోసిస్తూ నా ఈప్మీనకేస్కునె సంచీలోకి సెయ్యి బెడితే, ల్యాపుటపు, బొక్కులు, కాయితకాలు, అయ్యి ఇయ్యి మట్టీ మషాణం, బయటి హార్డ్ డ్రైవ్, తోబాటు ఓటు మీల్ డబ్బా తగిలింది. జర్రున బైటికి గుంజునా . ఇట్టా ఓ సంచి తీసానా

From ఓట్మీల్

ఓ గలాసులో ఏడ్నీళ్ళు పోసినా

From ఓట్మీల్

సంచి చింపేసి ఏడినీళ్ళలో బోసినా

From ఓట్మీల్

ఓ రెంణ్ణిమిషాలు మూతబెట్టి ఉంచినా.

From ఓట్మీల్

ఓ సెంచా బెట్టి ఓ పాలి కలిపేసి సుబ్బనంగా లాగించినా!!!

రొట్టె చుట్టు

ఇయ్యాల మావిడ రొట్టెల్జేసి అవ్వతలనూకి కూరసెయ్యటానికి టైం దొరకట్లా ఏమైనా సెయ్యరాదా అని పిల్లల్తో పర్గులుపెడుతూ అంది.
ఏమున్నాయ్ అన్నా.
క్యారెట్లు పాడైపోతున్నాయ్ అంది.
ఫ్రై జేస్కో అంది.
నీ ఇష్టం కిచెన్ నీదే అంది.
సరే, ఎప్రాన్ నడుముకి కట్టుకునేలోపు మళ్ళీ ఓ మాట సెప్పింది. క్యారెట్టు తురిమి ఉప్పు, మిరియాలపొడి జల్లుకుని లాగించొచ్చుకదా అని ఓ సలహా పడేసింది.
ఠడా!! మంచి ఆలోచనే అని దూకా, రంగంలోకి.
తను ఇచ్చిన ఔడియాని పొడిగించా.
ఇలా -
క్యారెట్ల పైన తొక్కని ఓ రౌండు తీసేసి, పీలర్తో క్యారెట్టు మొత్తాన్నీ స్పగెట్టి లా పీల్ చేసేసా.
అదే చేత్తో ప్రిజ్జీలోంచి పాపాయు దోస్కాయ ( బేబీ క్యూకుంబర్) ని తీసి సన్నగా తరిగేసేసి,
ఓ ఉల్స్ ని సన్నగా నిలువునా తరిగేసేసి అన్నీ ఓ తెల్ల బొచ్చలో వేసేసి, ఓ నిమ్మ బద్ద పిండేసి కొంచెం ఉప్పుజల్లేసి ఇలా

బాగా కలిపేసి,
రొట్టె పైన పెట్టి మద్దెనుండి మడిచి ఈ చివర్ని లోనికి మడిచి, ఆ చివర్ని మొత్తం ఇలా

సుట్టేసి సుబ్బరంగా లాగించా.
దీంట్లోకి మొలకెత్తిన పెసలు, మొలకెత్తిన సజ్జలు ఏవైనా మస్తుగుంటై.

గోంగోర రోటి పచ్చడి.

మొత్తానికి మా దేశీ కొట్టోడు గోంగోర మహా వృక్షాలని తెచ్చాడు మొన్న. సూడంగనే పాణం గిలగిల్లాడి, ఓ నాలుగు డాలర్లు పోతే పోనీ దీనెక్క గోంగోర తిన్ని బతుకెందుకు అనేసి, ఓ నాలుగు వృక్షాలను లారీకేసి తోలకొచ్చా. ఆదివారం, కుంపటెట్టి గోంగోర పప్పు తవండుకోవాలని ముందు ప్రణాళికేస్కున్నా, సమయాభావం పిల్లల డిమ్యాండ్ల వల్ల పప్పుగిన్నె కుంపట్లోంచి మామూలు పొయ్యిమీదకి మారింది. పప్పులో ఎయ్యంగా మరో రెండు వృక్షాలు మిగిల్నై. ఏటిసేయ్యాల్రా బగమంతుడా అంది మావిడ పిల్లని సంకనేస్కుని. వెనువెంటనే, పచ్చడి నూరూ అని నోట్ళోంచి, మన ప్రమేయంలేకుండా జాలువార్చింది నాలుక ఇంత నీళ్ళు నోట్లో ఊర్చుకుంటూ. అటులనే మాహారాజా అనేసి ఆ ప్రాణి రోలు కడగటం మొదలెట్టింది (రోలు అనగా గ్రైండరు)
ఇంతక మునుపు జరిగిన గోగుల యుద్ధంలో నే చెప్పినట్టుగా, గోంగోరతో పచ్చళ్ళు రకరకాలు.
సరే గోంగోరతో చేసే ఈ పచ్చడికి కావాల్సింది, నేను తెచ్చినట్టుగా గోంగోర మహా వృక్షాలు కాదు. ఏక్ దం ఫ్రెష్, నవనవ లాడే గోంగోర మరియూ, అప్పటికప్పుడు కోస్కొచ్చిన పచ్చిమిరగాయలు. ఓర్నీఇంట వాన కురవా, యాడ దొరకతన్నాయ్ ఇయ్యాల్రేపు "ప్రెష్" సరుకు అని అనుకోవచ్చు అందరూ, అబ్బా చోద్యం అనుకోనూ వచ్చు. అలాంటి ఆకుతో మిరగాయల్తో సేత్తే ఆ రుచే ఏరు అని నా అర్ధం.
సరే, ఓ కట్ట గోంగోర, ఓ అరడజను మిర్చి, రెండు ఎండు మిర్చి, నాలుగు వెల్లుల్లి రెబ్బలు, అరచెంచా మెంతులు, తిరగమాత సామాన్లు, ఓ చెంచా నూనె.
ముందుగా గోంగూర. మిరగాయలు ఉడకబెట్టి పక్కనెట్టుకోవల. అయినాక,
భాండీ ఎట్టి తిరగమాత ఏసేసి, దాంట్లోనే మెంతులేసేసి, చిట్పట్ అన్నాక ఎల్లుల్లి ఏసేసి ఏపాల. అయినాక ఆ ఉడకబెట్టిన గోంగోర, మిరగాయల్ని ఇందలో ఏసేసి ఓ సారి ఏయించి (నీళ్ళు ఉంటే అయి ఇంకిపోయిందాక పొయ్యిమీనే ఉంచాల), ఉప్పు ఏసేసి, రోట్లో ఏసుడు, నూరుడు. అంతమెత్తగా ఉండాల్సినపన్లా. కచ్చాపచ్చీగా ఉండా పర్లా.

దీనికి కీ - మిర్చీ, గోంగోర ఆటి వాసన్ని కోల్పోకుండా చూడాల. కాబట్టి మోడరేట్ గా వేయించుకోండా.
ఈ పచ్చడి ఎక్కువకాలం ఉండదు. కేవలం రెండు మూడ్రోజులు మాత్రమే.

ఇక దీంట్లో ఎన్ని కేలరీలు ఉంటాయో నాకు పెద్ద తెలియదు. కానీ బలమైన ఆహారమే. కారణం దీంట్లో కేవలం ఒక స్పూను నూనె, రుచుకి ఉప్పు, మిగతావి ఆరోగ్యకరమైనవే. గోంగోరలో ఇనుము అధికశాతం ఉంటుంది.

నేను ఈ రోజు రాగిజావలో దీన్నేస్కుని ఓ కుమ్ముడు కుమ్మాను.
మీరూ ఆనందించండి.

[సర్లే బాసూ అంతా బాగనే ఉంది, మరీ ఏంది అంత కొంచెం అయ్యింది పచ్చడీ అనుకుంటున్నారా? రుసి సూద్దాం అని నోట్టో ఏస్కున్నామయ్యా, ఏందంట, సగం అయిపోయింది :):)]

పళ్ళెం పద్ధతి - ఒక వివరణ

ఈ మధ్య నేను ప్రచురించిన గోధుమరవ్వ ఉప్మా పోస్టుకి మన బ్లాగ్ సోదరుడు "నెమలికన్ను" మురళి, మధుమేహ వ్యాధి గ్రస్తులు తినగలిగే కొత్త రకం వంటల గురించి రాయమని సూచించారు.
ఆ దిశగా ఈ ప్ర్రయత్నం, పోస్టు.
మధుమేహ వ్యాధిక్రస్తులకి చాలా అపోహలు, చాలా అపనమ్మకాలు, భయాలు అవీ ఇవీ ఉంటాయి. ఏది తినొచ్చు, ఏది తినకూడదూ. హమ్మో అది తింటె ఎలా, ఇది తింటే ఎలా...లాంటి ఎన్నో అలోచనలతో భయపడుతూ ఉంటారు.

గూగుల్లో గెలుకుతూ ఉంటే ఈ క్రింది సమాచారం తగిలింది. ఉపయోగపడుతుందీ జనాలకి అని ఇక్కడ పెడుతున్నా.
ప్లేట్ మెథడ్ - అనగా పళ్ళెం పద్ధతి -
అంటె భోజనంలో ఏమి తినొచ్చు అని.
ఈ క్రింది బొమ్మని చూడండి.


ఇది మీరు భోజనం చేసే పళ్లెం అనుకుందాం. పళ్ళెం అంటే, అర్ధవంతంగా ఉన్న సైజులో అని. పళ్లెం అనగా స్థాభాళం కాదు.
ఇప్పుడు, ఆ పళ్ళాన్ని, పైన చెప్పిన విధంగా మూడు భాగాలు చేస్కోండి. అంటే రంపం తెచ్చి కోస్కోండి అనికాదు, మూడు భాగాలు చేసాం అని ఊహించుకోండి. అనగా, ముందుగా, అడ్డంగా ఒక గీత గీయండి. పళ్ళెం రెండు భగాలయ్యింది. ఇప్పుడు కింది భాగంలో నిలువుగా ఒక గీత గీయండి.
ఇప్పుడు పైన ఉన్న సగభాగం అనగా సింహ భాగం NS పదార్ధాలు, మిగతా దాంట్లో ఒక సగం S పదార్ధాలు, మిగతా P పదార్ధాలు తినాలి. దీంతో పాటు తక్కువ లేక అస్సలు కొవ్వు లేని పాలు ఒక కప్పు, పండ్ల ముక్కలు ఒక కప్పు తీస్కోవాలి.
NS పదార్ధాలు అనగానేమీ?
NS = నాన్ స్టార్చీ అని. గంజి లేని పదార్ధాలు. ఉదాహరణకి
పాలకూర, క్యారెట్లు, లెట్యూస్, గ్రీన్స్, కోసుగడ్డ, బోక్చోయ్ (చీనా కోసుగడ్డ అంటారు)
గ్రీన్ బీన్స్, బ్రొక్కొలి, కోసుపువ్వు, రామ్ములక్కాయ
పండ్ల రసాలు, సల్సా, ఉల్లి, దోసకాయ, బీట్రూట్, బెండ
పుట్టగొడుగులు, మిర్చి, టర్నిప్ (ముల్లంగి లాంటిది)
S పదార్ధాలు అనగానేమీ?
S = స్టార్చీ అని. అనగా గంజిగల పదార్ధాలు. ఉదాహరణకి -
ముడి ధాన్యాలు లేక వాటి ఉత్పత్తులు - హోల్ వీట్ బబ్రెడ్డు.
ఎక్కువ పీచుగల పదార్ధాలు - అనగా తృణధాన్యాలు.
ఓట్మీల్, గ్రిట్స్(thick maize-based porridge), హోమిన్య్ లేక క్రీం ఆఫ్ వీట్.
వరి, పాస్తా (హోల్ గరిన్ పాస్తా) , రొట్టెలు,
మొక్కజొన్న, జొన్న, సజ్జ, రాగి,
ఉడకబెట్టిన బీన్స్ - సోయా బీన్స్, బఠాణి, కిడ్నీ బీన్స్, లెంటిల్స్, పుల్లశనగ, ఇత్యాదివి.

ఇక P పదార్ధాలు -
మాంసాహారం లేక ఎక్కువ ప్రొటీను గల శాకాహారం.

మధుమేహ ఆహార పిరమిడ్

అలానే కొన్ని ఉపయోగపడే తీగలు -
https://www.diabetes.org/food-nutrition-lifestyle/nutrition/meal-planning/create-your-plate.jsp

కాబట్టి ఏమి తిన్నా, సరైన రీతిలో తినాలి అనేది పాయింటు. పళ్ళు తినకూడదా? మామిడి పండు తినకూడదా? తినొచ్చు. ఎంత అనేది ప్రశ్న.
ఇలా ఎప్పుడైనా మంచి సమాచారమ్ దొరికితే ఇక్కడ పెడుతుంటా.